Utangulizi wa kiufundi wa Etha

Mahitaji ya awali

Ili kukusaidia kuelewa ukurasa huu vizuri zaidi, tunapendekeza usome kwanza Utangulizi wa Ethereum.

Sarafu-fiche ni nini?

Sarafu-fiche ni njia ya kubadilishana inayolindwa na leja inayotegemea mnyororo wa vitalu.

Njia ya kubadilishana ni chochote kinachokubalika sana kama malipo ya bidhaa na huduma, na leja ni hifadhi ya data inayofuatilia miamala. Teknolojia ya mnyororo wa vitalu inaruhusu watumiaji kufanya miamala kwenye leja bila kutegemea mtu mwingine anayeaminika kudumisha leja hiyo.

Sarafu-fiche ya kwanza ilikuwa Bitcoin, iliyoundwa na Satoshi Nakamoto. Tangu kutolewa kwa Bitcoin mnamo 2009, watu wameunda maelfu ya sarafu-fiche kwenye minyororo ya vitalu mingi tofauti.

Etha ni nini?

Etha (ETH) ni sarafu-fiche inayotumika kwa mambo mengi kwenye mtandao wa Ethereum. Kimsingi, ndiyo njia pekee inayokubalika ya malipo kwa ada za muamala, na baada ya Unganisho, Etha inahitajika ili kuthibitisha na kupendekeza vitalu kwenye Mtandao Mkuu. Etha pia inatumika kama aina kuu ya dhamana katika masoko ya ukopeshaji ya fedha zilizogatuliwa (DeFi), kama kipimo cha akaunti katika masoko ya NFT, kama malipo yanayopatikana kwa kufanya huduma au kuuza bidhaa za ulimwengu halisi, na zaidi.

Ethereum inaruhusu wasanidi programu kuunda programu tumizi zilizogatuliwa (dapps), ambazo zote zinashiriki bwawa la nguvu ya kompyuta. Bwawa hili la pamoja lina kikomo, kwa hivyo Ethereum inahitaji utaratibu wa kuamua ni nani anayepata kuitumia. Vinginevyo, dapp inaweza kwa bahati mbaya au kwa nia mbaya kutumia rasilimali zote za mtandao, jambo ambalo lingezuia wengine kuipata.

Sarafu-fiche ya Etha inasaidia utaratibu wa kupanga bei kwa nguvu ya kompyuta ya Ethereum. Watumiaji wanapotaka kufanya muamala, lazima walipe Etha ili muamala wao utambuliwe kwenye mnyororo wa vitalu. Gharama hizi za matumizi zinajulikana kama ada za gesi, na ada ya gesi inategemea kiasi cha nguvu ya kompyuta kinachohitajika kutekeleza muamala na mahitaji ya mtandao mzima ya nguvu ya kompyuta kwa wakati huo.

Kwa hivyo, hata kama dapp yenye nia mbaya ingewasilisha kitanzi kisicho na mwisho, muamala hatimaye ungeishiwa na Etha na kusitishwa, na kuruhusu mtandao kurudi katika hali ya kawaida.

Ni kawaida kuchanganya (opens in a new tab) Ethereum na Etha — watu wanaporejelea "bei ya Ethereum," wanaelezea bei ya Etha.

Ufuzi wa Etha

Ufuzi ni mchakato ambao Etha mpya inaundwa kwenye leja ya Ethereum. Itifaki ya msingi ya Ethereum inaunda Etha mpya, na haiwezekani kwa mtumiaji kuunda Etha.

Etha inafuliwa kama tuzo kwa kila kitalu kinachopendekezwa na katika kila kituo cha ukaguzi cha kipindi kwa shughuli zingine za mthibitishaji zinazohusiana na kufikia mwafaka. Jumla ya kiasi kinachotolewa inategemea idadi ya wathibitishaji na kiasi gani cha Etha wameweka dhamana. Utoaji huu wa jumla unagawanywa kwa usawa kati ya wathibitishaji katika hali nzuri kwamba wathibitishaji wote ni waaminifu na wako mtandaoni, lakini kwa kweli, inatofautiana kulingana na utendaji wa mthibitishaji. Takriban 1/8 ya utoaji wote huenda kwa mpendekezaji wa bloku; iliyobaki inasambazwa kwa wathibitishaji wengine. Wependekezaji wa bloku pia hupokea vidokezo kutoka kwa ada za muamala na mapato yanayohusiana na MEV, lakini haya yanatoka kwa Etha iliyorejeshwa, sio utoaji mpya.

Kuteketeza Etha

Pamoja na kuunda Etha kupitia tuzo za kitalu, Etha inaweza kuharibiwa kupitia mchakato unaoitwa 'kuteketeza'. Etha inapoteketezwa, inaondolewa kwenye mzunguko kabisa.

Kuteketezwa kwa Etha hutokea katika kila muamala kwenye Ethereum. Watumiaji wanapolipa miamala yao, ada ya msingi ya gesi, iliyowekwa na mtandao kulingana na mahitaji ya miamala, inaharibiwa. Hii, pamoja na ukubwa tofauti wa kitalu na ada ya juu ya gesi, hurahisisha ukadiriaji wa ada ya muamala kwenye Ethereum. Wakati mahitaji ya mtandao ni makubwa, vitalu (opens in a new tab) vinaweza kuteketeza Etha nyingi kuliko zinavyofua, na hivyo kusawazisha utoaji wa Etha.

Kuteketeza ada ya msingi kunazuia uwezo wa mzalishaji wa kitalu kuchezea miamala. Kwa mfano, ikiwa wazalishaji wa kitalu wangepokea ada ya msingi, wangeweza kujumuisha miamala yao wenyewe bila malipo na kuongeza ada ya msingi kwa kila mtu mwingine. Vinginevyo, wangeweza kurejesha ada ya msingi kwa baadhi ya watumiaji nje ya mnyororo, na kusababisha soko la ada ya muamala lisilo wazi na gumu zaidi.

Madhehebu ya Etha

Kwa kuwa thamani ya miamala mingi kwenye Ethereum ni ndogo, Etha ina madhehebu kadhaa ambayo yanaweza kurejelewa kama vipimo vidogo vya akaunti. Kati ya madhehebu haya, Wei na Gwei ni muhimu sana.

Wei ni kiasi kidogo zaidi cha Etha, na kwa sababu hiyo, utekelezaji mwingi wa kiufundi, kama vile Karatasi ya Njano ya Ethereum (opens in a new tab), utategemea hesabu zote katika Wei.

Gwei, kifupi cha giga-wei, mara nyingi hutumika kuelezea gharama za gesi kwenye Ethereum.

Kuhamisha Etha

Kila muamala kwenye Ethereum una uwanja wa value, ambao unabainisha kiasi cha Etha kitakachohamishwa, kilichotajwa katika Wei, kutuma kutoka kwa anwani ya mtumaji hadi kwa anwani ya mpokeaji.

Wakati anwani ya mpokeaji ni mkataba mahiri, Etha hii iliyohamishwa inaweza kutumika kulipia gesi wakati mkataba mahiri unatekeleza msimbo wake.

Zaidi kuhusu miamala

Kuulizia Etha

Watumiaji wanaweza kuulizia salio la Etha la akaunti yoyote kwa kukagua uwanja wa balance wa akaunti, ambao unaonyesha umiliki wa Etha uliotajwa katika Wei.

Etherscan (opens in a new tab) na Blockscout (opens in a new tab) ni zana maarufu za kukagua salio la anwani kupitia programu tumizi za wavuti. Kwa mfano, ukurasa huu wa Blockscout (opens in a new tab) unaonyesha salio la Taasisi ya Ethereum. Salio la akaunti linaweza pia kuuliziwa kwa kutumia pochi au moja kwa moja kwa kufanya maombi kwa nodi.

Usomaji zaidi

• Kufafanua Etha na Ethereum (opens in a new tab) – CME Group
• Waraka Mweupe wa Ethereum: Pendekezo la asili la Ethereum. Hati hii inajumuisha maelezo ya Etha na motisha nyuma ya uundaji wake.
• Kikokotoo cha Gwei (opens in a new tab): Tumia kikokotoo hiki cha Gwei kubadilisha kwa urahisi Wei, Gwei, na Etha. Ingiza tu kiasi chochote cha Wei, Gwei, au ETH na ukokotoe ubadilishaji kiotomatiki.

Je, unajua rasilimali ya jamii iliyokusaidia? Hariri ukurasa huu na uiongeze!